على باب سفارة كندا

على باب سفارة كندا.. لمحت إبليس و ف إيده استماره.

باقول له
على فين.. قاللي بص .. يا هجرة ..يا إعارة.....

يا عم زهقت.. كفرت
.. ألاقيش معاك سيجارة..

أنا انتهيت خلاص .. لا نافع وسواس ولا
خناس

ولا ليا عيش وسط الناس بتوع الحزب بتاعكم اياه

دول عالم
مجرمين.. عندكوا فائض ف الفساد..

عن كل البلاد..

ومش
محتاجين شياطين .. ماليش عيش ف دي البلاد

بقالي سنين عاطل .

و
هم بيعرفوا يقلبوا الحق باطل..

و يسلكوا القاتل .. و يمشوا ف جنازة
المقتول..

ومافيش مشاكل..

يا عم ده انا بقيت أوسوس
بالمقلوب..

و أقول للحرامي .. كفاية بقى .. توووووب..

إنت
إيه.. لوحدك هاتعمل كل الذنوب..؟؟

و أنا إبليس أشتغل واعظ .. ولا
كمساري ف اتوبيس..

يا عم ده أنا زمان

كنت أستنى حد ينسى يسمي
وهو بياكل لقمته..

دلوقتي كل أكلكم ملوث .. و بصراحه الواحد خايف
على صحته..

ده مافيش ضمير أساساً عشان أموته..

و كل واحد
بمزاجه .. خربانة ذمته..

يا عم ده كل حاجة اتسرقت..

وكده
الأجيال الجديدة م الحرامية اتظلمت..

يا راجل ده من كتر ما لطشت
معايا..

خرجت ف مظاهرة مع الناس اللي بتقول كفاية..

و برضه
......... مافيش فايدة